CNBC搶閘報：中國GDP增長xxx％

【明報專訊】噚日內地公布第二季經濟增長數字，可以話係全球矚目嘅新聞，一眾電子傳媒當然爭分奪秒搶先報道。美國全國廣播公司旗下的財經新聞頻道CNBC噚日就成功「突圍而出」，率先報道中國次季GDP增長有「xxx％」。


大家唔好以為係小琴貪得意將「7.5」改為「xxx」，查實係個「焦點新聞」真係就咁樣出咗街，相信有CNBC員工心急得滯，仲未植入最新數據就趕住將條底稿當新聞，擺咗個大烏龍。查實小琴第一眼望到有3個交叉真係完全摸不着頭腦，仲心諗唔通阿爺咁犀利，將內地GDP增長谷到爆上三位數咁勁？