西營盤大棚閃電拆除

【明報專訊】近日有路過西營盤正街嘅朋友，見到成條大斜路搭咗個竹棚平台，係明愛莫張瑞勤社區中心同長春社文化古蹟資源中心合辦嘅西營盤墟日。呢個活動可以勾起大家集體回憶本來係好事，之但係個棚實在太巨型，竹枝搭到去旁邊大廈嘅冷氣機。《明報》噚日收到讀者投訴，向食環署了解之際，點知即日食環署就通知主辦單位要拆棚，因為太多人投訴，Emily估唔到今次食環署反應快到咁。


西營盤墟活動之一

活動係5月25日至6月2日舉行，平台可以容納80人，有傳統花牌同麵粉公仔製作示範，又講西區特色同歷史，由匯豐銀行贊助。但係呢個活動原來冇諮詢過區議會同居民，主辦單位向食環署申請牌照後就開始搭棚。當區區議員李志恒收到居民投訴，話個棚用住宅冷氣機、街邊消防閘同欄杆借力，令到佢哋好擔心安全問題咁話。


李志恒話，警方同消防處派過人嚟睇過，食環署亦話屋宇署有人睇過個棚係結構安全，但佢覺得無理由咁近民居整個咁大型竹棚，竟然完全無諮詢區議會同居民。西營盤墟日主辦單位喺facebook話，雖然舞台暫時拆除，但周六周日嘅活動會繼續喺正街舉行。


明愛負責該項目嘅黃志鴻就話，今次係應食環署嘅勸喻，明愛主動將個棚拆咗。對於冇諮詢，佢話呢個只係好小型嘅社區活動，亦已經跟足官方程序。