「開心大行動」優惠 有陳綺貞睇

【明報專訊】大陸客近期急跌，旅遊同埋零售業騰騰震，為咗頂住個市，優質旅遊服務協會月底就會推出「開心．著數大行動」，話有成萬個商戶參加，咁多優惠，邊個最吸引？當大會講到屯門市廣場嘅優惠，可以換取商台嘅拉闊音樂會入場券，在場記者都忍唔住嘩咗一聲。


草蜢拍電視宣傳片

除咗陳綺貞，個音樂會仲有盧廣仲、白目樂隊同埋魏如萱。不過，要攞到呢個演唱會飛一啲都唔容易，首先要係屯門市廣場Phone App會員，並且喺本月27日起嘅周一至周五（公眾假期除外），喺3間舖以電子貨幣消費2500元，其中一間要係食肆，就可以換一張飛，滿4000元可換兩張。


為咗宣傳呢個開心行動，搞手搵咗男子組合草蜢拍電視宣傳片，佢哋喺酒樓食肆同商場又跳又唱，整旺個場，製造熱鬧氣氛。今次搞手係優質旅遊服務協會，旅發局係支持機構，幫手做宣傳。由財爺喺2月開始宣傳撥8000萬畀旅發局加強推廣，到家陣只有兩個月，突然要搞個宣傳大計，局中人話好似Wine and Dine突然改地點咁趕急，真係要頻頻開OT至搞得掂。