環保小巴「燒炭」？

【明報專訊】有小巴停喺小巴站時，車頂顯示版顯示「我係歐4環保型 燒炭進行中」，有人影咗相，仲上載埋facebook。睇真啲，其實車上無人，原來呢架係環保小巴，當時正進行「炭粒清理中」嘅程序啫。


燒去死氣喉內炭粒

睇番資料，原來歐盟4型小巴，可以將死氣喉內嘅炭粒自動燒去，但有時要轉用人手操作，手停口停，呢個缺點一直為業界詬病。的士小巴權益關注大聯盟主席黎銘洪話，全港4000幾部小巴，石油氣同柴油小巴各佔一半，其中大約400部柴油小巴係環保型號、即歐盟4或5型，全部都要燒炭，約每日一次，每次至少半小時，相信相片中嘅小巴正進行呢個程序。黎銘洪又話，搞呢樣嘢，做少好多生意，所以業界唔肯換舊車，都幾無奈。


Emily就覺得，其實只要將「燒炭進行中」改為「炭粒清理中」，就唔會引起誤會啦。