保水上樂園 盛智文大嚿同聲氣

【明報專訊】上年6月獲得續任嘅海洋公園主席盛智文（Allan Zeman），任期到2014年屆滿，到時佢將會前後做咗11年主席，但依然未厭倦，噚日佢出席立法會，解答議員對大樹灣水上樂園計劃嘅疑問時，即場講咗句：「I hope to be the chairman forever」，表明熱愛海洋公園嘅心迹。


話說人民力量議員陳偉業喺會上話，已經好耐無支持政府項目，但就全力支持海洋公園興建水上樂園，皆因以前海洋公園嘅水上樂園，為佢帶來唔少美好回憶。當年佢帶細路去玩得好開心，「嗰時仲有幾舊腹肌，而家得番一舊豬腩肉」。對於其後水上樂園突然關閉，大嚿就話非常失望同不滿，要求盛智文承諾，如果未來新嘅水上樂園又要關閉，一定要向立法會交代。


盛智文聽到之後好感動，話水上樂園係本港重要歷史之一，唔希望再有倒閉嘅一日，承諾如果要再關閉水上樂園，一定會到立法會交代，就算佢之後無得再續任，都一定會將呢個信息交畀下一任主席。