世界思想家 陳馮有份

【明報專訊】英國雜誌Prospect每年會選出「世界思想家排行榜」，2013年嘅候選人名單噚日出爐，10個評判提名今年世界思想家嘅候選人有65名，有唔少響噹噹嘅人物，例如2008年諾貝爾經濟學獎得主Paul Krugman、內地維權律師陳光誠等等，Emily睇睇吓，名單中有香港人喎，佢就喺前衛生署長、現任世界衛生組織總幹事陳馮富珍（圖）！

艾未未汪暉都入選

評判揀呢65個人其實好認真，佢哋須仍然在生同埋活躍，喺所屬領域有卓越表現，亦有國際影響力，而影響力喺過去12個月仲有效，亦要對嚟緊嘅全球問題有所影響。候選人除咗上述幾個，仲有英國歷史學家Niall Ferguson，中國嘅清華大學教授、被稱為新左派領袖嘅汪暉，曾被扣留嘅藝術家艾未未等。


要對國際問題有影響

陳馮富珍喺世衛嘅工作表現理想，更會連任總幹事至2017年，Emily就記得當年佢喺香港做官，處理過禽流感同SARS，唔少網民知道佢入選，即刻重提佢當年「日日都食雞」嘅言論。今次陳太做咗「世界思想家」，唔知同SARS十周年有無關係呢？