「八仙」出巡賀洪聖爺

【明報專訊】噚日係農曆二月十三日，亦係傳說中嘅「南海之神」洪聖爺嘅寶誕，擁有濃厚漁民傳統嘅鴨脷洲居民一如以往喺呢個大日子搞慶祝活動。南區婦女會仲由即日起逢周末為市民提供免費導賞員，帶大家暢遊南區，包括240幾年歷史嘅洪聖廟，搞到Emily都心思思想放假去南區玩。


噚日南區居民請嚟「八仙」代表，喺鴨脷洲大街上帶住八大法器、坐喺轎上巡遊，主辦單位封咗鴨脷洲唯一嘅大街，由街頭巡遊到街尾，有啲老人家唔執輸，仲擔埋櫈仔搶頭位，排排坐喺街邊，睇住金龍、青龍等瑞獸行過。


咁洪聖爺究竟係邊個？街坊就話佢係唐代人，因上通天文下知地理，長年為漁民問風雨，死後獲封為神，一直受漁民景仰。巡遊雖然只有噚日一日，但讀者想感受吓鴨脷洲同南區風情，南區婦女會即日起至5月底，逢星期六日免費提供導賞活動，市民可跟住資深導賞員聽吓南區歷史文化，同埋去洪聖廟上香祈福。