左中右祝福患癌維園阿伯

【明報專訊】「維園阿伯」都算係港台節目《城市論壇》嘅特色之一，自從80歲「維園阿伯」許金池上個禮拜自爆患癌，唔少人都好關心佢嘅情况，噚日未開論壇之前，一班忠實觀眾晨早就準備張心意卡送畀許伯，齊齊簽名祝佢身體健康，搞到佢笑到見牙唔見眼。


「維園阿哥」被勸出山

論壇完咗，主持人謝志峰就邀請成30人移師港台餐廳擺咗兩圍，出席者當然唔止阿伯，仲有反共嘅維園衝鋒「大陸朱」、青年民建聯同青年公民代表、一班年輕人，仲有聲稱「退隱江湖」嘅「維園阿哥」任亮憲都嚟埋，真係不分左中右政見嘅人都畀面。


阿伯墨寶個個爭住要

任亮憲同Emily講，佢同許伯相識一場算係緣分，「識英雄重英雄」，雖然意見分歧，不過都係為咗言論自由。至於佢嘅前景，維園阿哥話家周末成日都飛咗去台灣公幹，所以「退隱江湖」，不過阿伯係咁叫佢重出江湖，但任亮憲睇嚟唔多想喇。


噚日食飯影相不特止，謝志峰仲帶咗文房四寶，畀愛好寫書法嘅許伯即席揮毫，唔少人仲排隊叫佢寫字。許伯同Emily講，家日日都會約好友出嚟見面，佢話自己只係小人物，好多謝各方朋友捧場同支持認同，仲好感動喎。佢又話，雖然家行到人生最後一段路，但係腳步輕快，唔會遺憾。