大姐大手記﹕溫拿找到嫩版五虎

【明報專訊】譚詠麟（阿倫）是個開心快活人，愈老愈風騷，愈老愈口沒遮攔，噏得就噏。日前溫拿五虎其中四虎，阿倫、鍾鎮濤（阿B）、彭健新（健仔）和陳友為吳錫輝主持nowTV的飲食節目錄影，阿倫接受傳媒訪問，對於其老友陳百祥（阿叻）的《叻哥遊世界》被彈無深度，阿倫不幫老友，還踩阿叻笑道﹕「呢啲跟人㗎！」


叫無綫再拍《溫拿狂想曲》

講到3月21日無綫和四大唱片公司破冰記者會，在環球已升上「神枱」的阿倫話自己要去昆明工作，不能夠出席。大姐大覺得可惜，上次他上無綫節目，無機會唱歌，今次終於可以唱了。阿倫抵死地說﹕「乜有得唱歌咩，以後大把機會，幾時都得，叫無綫開番個音樂節目囉，再製作《溫拿狂想曲》。」


阿B搭嘴建議除溫拿五虎外，再搵5個「嫩版五虎」。阿倫即哈哈大笑說﹕「咁就代代平安。」大姐大質疑誰可以做「嫩版溫拿五虎」？阿倫話契仔關楚耀可以扮他。阿B說﹕「飛輪海是但一個做我都無問題，因為他們的高度跟我差不多，最好當然是吳尊啦，靚仔嘛。」健仔就話蘇永康以前扮過他，都好神似。阿倫話唔似，笑言心目中有人選﹕「區端強啦，區端強似啲。」陳友就睇中李治廷，但即時被噓。阿倫說﹕「嘩，你和他差好遠喎！」


戴個假髮可以扮阿強

那誰來做「嫩版阿強」？阿倫笑說﹕「求其搵人戴個假髮，或者在橋底搵打小人嗰啲都得。不過，阿強好忙，他要拍黃百鳴的新戲《葉笨》。」大姐大指阿強一向沉默寡言，就算他在場都不會駁嘴，任由阿倫玩。阿倫認同，還哈哈大笑。阿倫一向貪玩，幸有江湖地位，個個亦知他得把口講吓，所以無人會計較，更加不會反面。不過其他人千祈咪學阿倫隨口噏，好容易禍從口出，好似曾志偉、梁思浩和杜汶澤都試過衰多口惹禍！