麥記派包 市民睡衣排隊

【明報專訊】麥當勞噚日朝早免費派發23萬個15蚊嘅煙肉蛋漢堡，有市民凌晨4點摸黑到餐廳外排隊。喺石硤尾窩仔街分店，排隊人龍長約50多米，大部分係上咗年紀嘅公公婆婆。


喺深水埗黃金商場附近嘅分店，有連睡衣都未換嘅巿民排隊。大約6點，職員安排市民分批入店，每人攞一個包，秩序都幾好。麥當勞話，到上晝9點，已派咗一半，額外會將1萬個煙肉蛋漢堡換領券捐畀紅十字會。


今次麥記派包活動包括亞洲、中東及南非超過 30個國家及地區，5000間麥記參加，活動英文名係National Breakfast Day，中文直譯是全國早餐日，香港就命名「全港早餐日」。