財爺話港經濟似欖球賽

【明報專訊】香港國際7人欖球賽今個禮拜五就開波，每年呢段時間，全城欖球氣氛好熱烈，擅長劍擊嘅財爺曾俊華，噚日喺會展出席商界午餐會，演講時都話，欖球賽好反映到香港嘅經濟特色，兩者都係自由、開放同急速，本港以至海外公司，都可以好公平競爭咁話。


自由開放急速公平競爭

財爺話，一隊欖球隊會有前鋒衝鋒陷陣，香港經濟都係靠四大支柱產業撐住，呢啲產業請咗一半嘅工作人口，佔咗本地生產總值近六成。


借電影對白講下一代

佢又引用西片《帝國驕雄》主角、羅素高爾飾演嘅羅馬帝國大將軍麥斯武嘅說話，「我哋此生嘅貢獻將永垂不朽（What we do in life echoes in eternity）」，改為「我哋家做嘅嘢，對將來會有長遠影響」，十足十佢之前一直講，話呢一代嘅決定會影響下一代。