委任兩政助 觀塘又補選

【明報專訊】呢屆政府運作咗近9個月，噚日宣布再委任兩個政治助理，民建聯觀塘區議員陳百里加入商務及經濟發展局，另一個係無黨派嘅趙必立出任財經事務及庫務局政治助理，兩人分別喺呢個月20日同18日就任。


因為36歲嘅陳百里升官，所以佢原本所屬嘅坪石選區需要補選，之前一直有風聲話，民建聯立法會議員陳鑑林嘅囝囝陳俊傑有機會接棒，Emily噚日問過鑑林，佢話民建聯一定派人出選，至於人選係咪佢個仔，佢就話未有定案喎。


Emily聽聞陳百里做區議員期間，唔少活動佢都有大展歌喉，至於鑑林個仔不單修讀工商管理課程，原來都有學音樂，識得作曲彈琴唱歌，唔入政治圈都可以考慮入音樂界喎。不過，鑑林話畀個仔諗下先，至於係咪從政，佢未畀意見住。


陳百里去商經局 趙必立入財庫局

至於繼劉江華入政府做副局長引發補選，陳百里呢次又係咁，鑑林話兩個黨員都係喺另一個平台服務市民，係好事，觸發補選並非佢哋所願，又話呢次同泛民特登辭職引發嘅補選性質唔同，相信市民會理解咁話。


至於35歲嘅趙必立，Emily真係唔熟，睇佢嘅CV，係美國康奈爾大學經濟及化學工程學士，仲係英國牛津大學經濟及社會史碩士學位，又曾喺紐約及香港嘅高盛證券、花旗證券、貝爾斯登、摩根大通及渣打銀行等金融機構服務，佢加入財庫局都好合理。