九成網民想港變番殖民地

【明報專訊】正當北京兩會期間，中央為有港人揮舞港英旗唔高興，強調要搞好「一國」嘅教育，另一邊廂，《南華早報》每日一poll，前日嘅題目係問「香港人會否投票支持香港回歸英國殖民地？」，截至噚晚8點半，有93％人選擇「yes」，7％人選擇「no」，呢個結果真係令愛國愛港人士擔心喇。


2600人參加 反應幾乎歷來最好

據南早內部人士透露，呢次網上投票有約2600人參加，差唔多係有史以來最多人捧場嘅一次網上投票。Emily噚日打過畀佢哋嘅副總編輯譚衛兒，想了解多啲，但佢話呢個部分係由網上組負責，佢唔多清楚。


呢個調查前晚本來選擇「yes」嘅只有七成人，但因為唔少網友陸續發現，兼有逾2000人喺facebook分享，一經網上發酵，噚晚選擇「yes」嘅已飈升至九成幾。不過，有人提醒，網民同一般民眾投票始終有啲分別，同樣問題如果向全港市民提問，答案未必如此，不過呢個網上現象的確反映中港矛盾唔係咁易解決。前日福克蘭群島亦就類似議題舉行公投，九成九當地選民支持繼續成為英國殖民地，唔知係咪咁就引起南早編輯搞呢次網上投票呢？