中石化被指暴利 傅成玉呼冤

【明報專訊】小琴聽啲內地朋友講，佢哋臨畢業搵工嗰陣，阿媽都希望佢哋可以入國企，因為國企唔使做又人工高，福利更加好得離譜。不過噚日中石化（0386）董事長傅成玉喺兩會接受採訪，話中石化無獨吞財富，中央每使100蚊，就有3蚊3係中石化貢獻，反而中石化員工，收入多年都無得加。


大學生畢業10年 人工僅2600蚊

傅成玉話，前年經濟好景陣，中石化交稅3298億，平均每個工作日交稅超過10億。舊年經濟差啲，平均每日交稅都達8.8億。咁樣計落嚟，中央扶貧、辦教育、辦交通嘅支出，中石化都貢獻唔小。傅成玉又話，07年開始中石化每年按15%交資本收益分紅，建議盡量放到社保基金，令百姓得到實惠。


另外，傅成玉仲大吐苦水，話中石化普通員工收入太低，一個加油站工人每個月只有1300蚊。就算喺中石化做咗10年嘅大學畢業生，人工亦僅2600蚊，所以唔好再話中石化係暴利行業啦。