港藍籌女董事僅9.4%

【明報專訊】常言道，當今女人撐起半邊天，近年本港以至全球政界「手袋黨」聲勢壯大，已不是新鮮事。不過商界情况似乎有啲唔同，尤其是上市公司高層，仍以男性為主。如果淨係睇本港藍籌公司董事的女性數目，距離「半邊天」真係差好遠。一項研究顯示，今年本港藍籌公司649個董事職位，只有61個職位由女性擔任，即佔9.4%，僅較舊年增0.4個百分點，女性職位增加4個，人數則只增3人。如果按此速度，真要做到「半邊天」，即藍籌公司董事一半為女性，要等81年！


贊助呢項研究嘅渣打集團（2888），其大中華區主席曾璟璇本身就係商界出名嘅女強人，佢噚日現身說法，話若果公司管理層，董事會有多啲女性，其實有

唔少好處。佢話，更加多元化嘅董事會通常會活躍啲，互動性又強啲，討論及決定都更加豐富。渣打香港10位董事當中，有3位是女性，公司亦有自覺將來要增加女性同事。


李慧敏及范徐麗泰 最多藍籌董事職銜

近期港交所（0388）提出上市公司制定董事會多元化政策，進行上述研究嘅機構社商賢匯認為咁都未夠，應該要明確提出性別多元化。


該機構又指出，上市公司企業管治經常為人詬病嘅一個問題係，一人同時擔人多家公司董事，但呢個情况通常出現於男性董事身上，女性董事好少有此問題。藍籌女董事中，同時擔任最多董事職位嘅係李慧敏及范徐麗泰，每人同時擔任三家藍籌董事(見表)。


email: piano@mingpao.com