「你睇基本因素 我睇人民日報」

【明報專訊】這個標題，不是筆者創作，是來自一位上海朋友。她的原話是這樣的：「你們香港人買股票，都是看基本因素；內地人是看政策，所以都是看《人民日報》。」有內地經驗的朋友都會明白，在國內，即使市場化步伐一直加快，始終還是政策市，共產黨官僚要維持政策主導的大環境，理由簡單到暈，利益也。


要知國策，最簡單方法當然係睇新華社、《人民日報》同中央台每日嘅新聞聯播。這些立場難頂兼且毫無趣味嘅官媒，香港人當然唔會留意，但其實就在上周港股猛升嘅前夕，新華社發表文章「『風口』上的中國股市」，標題「風口」何所指的確有點無厘頭，但文章劈頭第一句就說清楚了：「風來了，想不動都不行。」


官媒吹風 股市「想不動都不行」

文章基本是對股市一面倒的唱好，但最重要還是文末：「今年經濟運行面臨較大壓力，尤需股票市場提供有力支持，維護股市穩定運行十分關鍵。當前，監管層應積極推進市場化改革，同時加大監管力度，引入相對穩定的長期資本，夯實股市基礎，呵護市場信心。」


文章發表第二天，已經升咗唔少嘅上證指數再創7年新高，滬深兩市成交突破1.55萬億，港股升近千點，成交破2500億，港股通首度用爆單日額度。同日，新華社和《人民日報》繼續發功催谷，先後發表文章「對市場存敬畏之心 股民且行且珍惜」、「資本市場聯通效應促內地與香港股市雙贏」和「此輪牛市有利於經濟發展」，直指「不管是『槓桿牛』，還是『改革牛』，期待都是『健康牛』」，又稱「健康的牛市能有效支持實體經濟轉型，支撐產業結構調整升級，鼓勵大眾創業和萬眾創新。」講到咁白，內地股民點會唔識做？


國家隊倘出動 港股氣勢更強

唔少人都相信，上星期係阿爺揮軍南下撐港股，仲有怪論話，阿爺今次係睇準香港政改決戰前夕，唔畀國際大鱷借機沽港股，所以就要國家隊出手。有「專家」仲話，等到泛民拉倒政改，阿爺就會由得港股倒跌，到時香港人輸咗錢，實會搵班泛民算帳云云。筆者無證據不敢亂估，但據官府老友指點，上星期初南下熱錢，基本上不是來自國家隊，而是數以萬計散戶。


這個消息如果屬實，就代表國家隊正規軍仍然未出動，到佢哋出動（例如公募基金），氣勢隨時勁過上星期嘅盛况。未出動正規軍，是否等如上星期不是阿爺出手，其實也很難說。正如上海朋友話，內地股民炒政策，官媒出口術前，肯定知道效果，但能唔能夠影響埋香港股市，就真係只有上帝至知。


又講吓政改。政改前夕，全民專心炒股，政商界大吹和風，打開愛國報章，「反港獨」戰似乎亦都暫時停止，除咗立法會主席曾鈺成說明「港獨在港無市場」，據聞商界亦有重量級人士向阿爺陳情，指所謂港獨人士在港真係寥寥可數。觀乎眼前的相對和諧氣氛，要靠政治議題搞撕裂，似乎暫時無乜市場。雖然如此，但一直堅持「是其是，非其非」嘅梁特，始終唔肯收口，把握任何機會向反對派開火，即使不是佢肚裏面條蟲，都估到梁特有何盤算。


政改前專心炒股 政商界大吹和風

噚日，天字第一號梁粉張震遠終於被法庭宣布破產，商界口痕友最關心嘅，當然係一眾借過錢畀佢嘅債主，要追債應該都凍過水。但其實無所謂啦，呢排個市升咁多，班債主不如炒多兩手。不過，今次破產案可能只係序幕，一連串嘅官司仲排緊隊，大家可以買定花生等睇戲。


[應正亮 廿四味]