高永文被迫除衫

【明報專訊】唔知噚日係咪好日呢，民主黨胡志偉、公民黨毛孟靜（Miss Mo）、陳家洛同埋郭榮鏗都選擇喺呢日為地區辦事處開幕，每日都要同議員打交道嘅高官當然畀面到場祝賀。當中最勤力嘅就要數食物及衛生局長高永文，一日走兩場，仲不幸被「天降」嘅朱古力擊中，搞到西裝褸都污糟埋。


話說高醫生先出席胡志偉喺黃大仙嘅議辦開幕禮，點知畀醒獅口噴出嚟嘅生菜同朱古力金幣擊中，原本已經溶溶哋嘅朱古力仲整污糟咗佢件淺色西裝褸，佢一度諗過換唔換第二件衫好，最終除咗件褸就趕赴下一場。


劉千石不談佔領中環

而以輕鬆打扮出場嘅就有運輸及房屋局副局長邱誠武。「邱武」一身短衫短褲現身，出席嘉賓都嚇一跳，佢解釋話善靈會朝早有個戶外籌款活動，為咗「積番啲陰德」決定出席。記者出身嘅Miss Mo即時詢問做過傳媒嘅邱武點睇香港記者喺北京被打，佢只係講咗句「新聞工作有意思」，冇正面回應，難怪在場嘅民主黨創黨主席李柱銘都講笑話，以後香港記者上京採訪都要著成邱武咁，畀人打都跑得快啲喎。


久未露面嘅職工盟創辦人劉千石亦有到場賀Miss Mo，但佢似乎唔多想評論時事，被問到點睇「佔領中環」亦唔答，話噚日唔係佢主場，要「分清莊閒」，唔會講太多。