林鄭讚無國界醫生

【明報專訊】噚日政務司長林鄭月娥幫一年一度嘅「無國界醫生野外定向」主持開步禮，佢話20幾年前喺保安局工作時已經認識無國界醫生，嗰時佢哋已經喺香港幫越南船民做嘢，林太好敬佩組織每遇天災同衝突，都第一時間到救援前線提供人道服務。


佢噚日順便參觀大會臨時搭建嘅模擬流動營養治療中心，試食專門為營養不良兒童而設嘅即食營養治療食品，話覺得味道似花生醬，仲非常好奇咁問用乜嘢材料做。


試食營養食品

連續第12年舉辦嘅無國界醫生野外定向，今年參加人數創新高，約3000人參加，年紀最細得1歲，最年長者69歲，活動共籌得480萬元。大會將賽事中心扮成救援現場，包括流動診所、臨時手術室，仲有由武裝分子看守嘅路障，等參加者體驗無國界醫生喺前線遇到嘅挑戰，今次仲吸引咗食衛局副局長陳肇始同立法會議員范國威、莫乃光等人參加名人賽。