田心補選 公民力量領先

【明報專訊】因為民建聯劉江華加入政府觸發嘅沙田田心區議會補選聽日舉行，各候選人都盡最後努力拉票。Emily聽聞，地區最新民調顯示，公民力量潘國山仍然領先，民主黨丁士元緊隨其後，拋離人民力量林匡正。


范國威撐人力

選戰進入最後直路，幾位候選人近日都show hand力爭支持。丁士元目前獲得大多數泛民黨派支持，公民黨湯家驊、鄭宇碩，公共專業聯盟莫乃光，民協馮檢基，工黨李卓人同張國柱更應承投票日當日落區站台，民主黨人都好感動。至於人力林匡正，就得到新民主同盟范國威支持，人力「教主」黃毓民同一班兄弟，近日頻頻落區為佢拉票。而政協委員林大輝就表明，選舉日會由北京趕返香港，支持潘國山。


有地區消息透露，一直領先嘅潘國山，最新民調支持度下跌至37%，但仍然較丁士元嘅25%高，而林匡正就以10%排行第三。值得注意嘅係，目前仲有28%市民話未決定投票意向。民調準唔準都好，Emily都呼籲未決定嘅市民出嚟投票，否則將來後悔就太遲。