雷添良今年兩會飲宴少

【明報專訊】今年兩會厲行節約，港區人代雷添良就大讚好。佢話，以往各部委及省市代表鍾意趁兩會宴請港區代表聯誼交流，朋友邀請唔去又唔畀面，佢上年最高紀錄係一晚走三場，仲話有啲代表跑場次數比佢多。阿Tim話，咁樣真係好浪費，因為每處坐一陣打招呼就趕住走，浪費食物及宴會金錢，但今年省市宴請幾近絕迹，佢可以輕鬆啲，又唔使飲咁多酒。


讚厲行節約係好事

講番人大工作，本身係會計師嘅阿Tim都好幫專業界爭取利益，今年會向人大提出要求，便利各專業界別人士到內地開公司工作。佢話，以會計師為例，家開會計師樓，港人合伙人最多只能佔四成，呢個比例會逐步收緊，即係港人會計師將來或只能在內地打工，唔可以做老闆。阿Tim希望爭取中央放寬政策，畀喺長駐內地工作嘅港人會計師可獲中國國民身分待遇，等港人都可以做公司合伙人。