陳振聰夫婦無攤牌

【明報專訊】商人陳振聰（新名Peter）繼續講解自己信基督教嘅經過，佢話當年發展婚外情，雖然冇同太太陳妙清「攤牌」，但相信太太嗰時已估到佢出面有女人。講到家財政狀况，有傳聞話Peter負債5億元，Peter對此無正面回應，只話「捉襟見肘係必然，但未足以完全處理唔到」、「上帝嘅計劃係足夠」。


「捉襟見肘係必然」

Peter早前接受商台節目《一圈圈》專訪。佢話信咗教後，同屋企人關係改善咗。佢讚揚家人一直對佢好包容，兩個仔「係有埋怨過少少，唔算多」，但擔心「唔出聲係咪代表心無嘢？」佢認為，有時家人太包容，反而會帶更大壓力畀佢咁話。


勸人唔好再掂風水

佢又話，之前幫人睇風水，「只是依據一本書去做」，堅持喺信教前無宗教信仰，但佢答唔到風水係咪道教，只話如果風水係「靈」，就一定有一個能量，「呢個能量一定來自撒旦魔鬼」，勸人唔好再掂咁話。


至於有冇後悔爭產，Peter話前幾年的確有，但信教後已有唔同看法，因為佢認為「上帝計劃係好奇妙嘅」，若唔係打官司，都唔會喺「崎嶇苦難嘅路」遇上神，所以家唔會後悔喎！