新聞類別
港聞
詳情#
【明報專訊】河上鄉洪聖古廟同排峰古廟（供奉觀音）2010年2月被評為三級歷史建築，上水鄉事委員會主席侯志強早前見間廟破破舊舊，就聯同村民花500萬元將間廟翻新，佢話本來都想等古物古蹟辦批錢，但對方話要入則，又話要將部分建築「據為己有」，嫌麻煩，於是先決定鄉民自己出錢搞掂。
兩間廟大有來頭，淨係響板同銅鐘就乾隆期間鑄造，計番都有200幾年歷史。河上鄉將會今個月24號搞盆菜宴同搶花炮，慶祝兩廟重新開幕。
早前侯志強同粉嶺北農村及居民聯席成員卓佳佳為新界東北發展問題火併，侯主席噚日帶記者去河水鄉睇農地。侯主席話，唔少農地主人唔係好想種，以1蚊1萬呎價錢租畀卓佳佳「任佢耕」！
話祠堂都賣得
開價每男丁收1億
但侯主席口風一轉，就講到政府收地，話若果政府出得起錢，連祠堂都賣得喎！但佢話如果要賣，政府最少要每個男丁畀1億元，河上鄉有400個男丁，即係無400億都唔好諗！佢仲話如果政府出得起呢個價，佢山頂起番個河上鄉同祠堂仲輝煌喎！唔知村民又點睇？
留言 (0)
