田少買蛋糕賀記者生日

【明報專訊】自由黨榮譽主席田北俊識飲識食，近日喺北京當然亦有周圍搵好嘢食，噚日自由黨喺北京宴請記者食飯，亦由佢哋司庫、百老匯老闆李子良試過好食，先帶記者去食。唔好以為田少鍾意食嘅都係貴價嘢，噚日佢就向記者推介酒店附近有間茶餐廳，話抵食又好味。


讚京茶餐廳抵食

田少話前晚同主席周梁淑怡去咗一間茶餐廳，兩個人都係食咗96蚊人仔，真係好抵，除咗每人有一碟飯外，仲有水果食，田少仲要強調「啲生果係乾淨㗎，有個罩蓋住咁拎出嚟」，唔知田少喺香港會唔會去茶餐廳食飯呢？

田少平日唔係好記得記者嘅名，但噚日佢竟然知道在場嘅商台記者談美琪生日，一入嚟就同人講生日快樂，仲即刻叫人去商場買咗個蛋糕嚟同佢慶祝，成班自由黨員、行家仲一齊唱生日歌畀壽星女聽，十分溫馨。