卿姐唔知阿涂住邊

【明報專訊】聯合國《公民權利和政治權利國際公約》下個禮拜會喺日內瓦開會，民主黨劉慧卿、涂謹申，公民黨陳家洛同工黨何秀蘭（Cyd）4名泛民立法會議員會去表達意見。卿姐例牌都會要求中央盡快落實真普選，同埋反對中央干預「一國兩制」，不過，唔知係分工合作定係無乜溝通，佢連黨友阿涂到時住邊度都唔知。


質疑中央唔畀真普選

全國政協大會新聞發言人呂新華前幾日話，2017年選出嘅特首會係「愛國愛港」。今日出發嘅卿姐質疑中央對「一國兩制」失去耐性，呂新華嘅言論證明中央唔會畀真普選，期望聯合國報告會列明中央唔應該干預「一國兩制」。Cyd噚晚就去咗日內瓦，佢會主力講同志平權，同埋六四民主女神像2010年被指無攞公眾娛樂場所牌照，佢會要求廢法。家洛就會講國民教育、學術自由同法治。