手機可當八達通嘟

【明報專訊】八達通已經成為市民消費嘅一部分，除咗用嚟搭車，家好多商舖都接受用八達通埋單。八達通管理層噚日同傳媒春茗時話，為咗擴闊電子錢包市場，八達通已經密鑼緊鼓，今年內將會推出「OCTOSIM」，即係附有八達通功能嘅SIM卡，以後市民用手機，就可以當八達通咁「嘟」。


今年內推出

負責呢個計劃嘅八達通技術總監甘志深透露，家八達通同幾間電訊商傾緊SIM卡細節，包括需唔需要收費，以及SIM卡嘅保安系統等。佢話，諗住張SIM卡只會有使用者嘅出生日期，以作識別，其他如身分證號碼等敏感資料都唔會加入。


至於報失，佢話傾向市民只要打一個電話，就可以cut咗手機同八達通兩邊功能，長遠更希望可以做到網上購物。