李剛拒評港事務

【明報專訊】兩會喺北京召開，港區代表分別下榻北京飯店及相連嘅貴賓樓，Emily噚日就遇上香港中聯辦前副主任李剛。佢早前匆匆由香港調往澳門中聯辦做副主任，噚日佢去到北京飯店探望港區嘅老朋友，臨走時仲同有望晉身政協常委嘅劉長樂雞啄唔斷。


被指是中聯辦主任合適繼任人

李剛同Emily講，喺澳門生活同工作都好開心，噚日見佢面色亦好好，笑容飽滿，但講到香港事務，李剛就話自己已經調走，以後唔會評論香港事務。至於澳門中聯辦主任嘅繼任人，李剛話須待中央決定，澳門中聯辦主任白志健較早前話，李剛係合適人選接替佢，李剛話呢個係對佢嘅高度評價。


另外，香港中聯辦主任張曉明今次以廣東人大身分到京，但實情全程與港區代表同宿同行，朝朝早喺酒店同港區人代食早餐收風。