唐唐遲到 10分鐘即閃

【明報專訊】特首梁振英噚日上咗北京，將會今日列席人大會議開幕，噚日佢喺北京飯店舉行特區政府酒會，邀請一眾人大代表、政協委員以及喺北京嘅商會代表、專業人士出席。酒會6點半舉行，不過，喺特首選舉中落敗嘅唐英年6點55分先至現身。記者當時只能喺會場外等待，無緣見到兩人有咩交流。唐唐逗留10分鐘就離開，佢唔肯講同CY有無交談，但就話有同對方握手。


稱有同CY握手

中央政府話要節約，過去呢個酒會都有提供食物，但今年就只係有酒水，Emily喺現場就無見到食物。酒會上，唔少地產商都畀面出席，好似長實副主席李澤鉅、恒地副主席李家傑等都早過特首到埗。而自由黨榮譽主席田北俊，喺酒會上拉埋李澤鉅、CY密密傾，佢會後話只係閒話家常喎。


田少拉住小超CY傾偈

今屆新任政協委員成龍亦有現身酒會，仲同從事電影業嘅候任旅發局主席林建岳好好傾。雖然成龍好出名，但噚日喺會場上就幾乎唔認得佢，唔少人覺得成龍較為蒼老。中聯辦主任張曉明、副主任殷曉靜等亦有在場。CY致辭時話，唔少港人都喺內地工作，佢哋為自己努力之餘，亦都促進國家發展，希望人代、政協都可以同佢哋了解多啲咁話。