長毛玩諧音 張宇人唔舒服

【明報專訊】財爺曾俊華前日發表財政預算案，噚日再去立法會財委會簡介，社民連「長毛」梁國雄發言嗰陣，話預算案叫人「要遙望繁星，也要腳踏實地」，不過基層無乜受惠，仲搞到滿天星斗，有街坊叫佢向財爺「X那星，還給他」。財委會主席張宇人（Tommy）一聽到，就叫長毛「唔好用呢啲咁嘅語言」，不過長毛唔理照講，Tommy唯有話長毛口音唔正，搞到佢聽得唔舒服。


《天各一方》議員爭住改

另外，泛民以至建制派議員，都就住預算案結尾引述《天各一方》歌詞「你有你的生活，我有我的忙碌」改字造句。工聯會王國興話，「你有你施政（報告），我有我財政（預算案）」，質疑佢唔處理單肢傷殘申領傷殘津貼。工黨李卓人就話財爺「你有你水深火熱，我有我hea住做」，同市民天各一方。教育界葉建源批評政府唔理家長教師訴求，落實15年免費教育、增加大學學額，「你有你的規劃，我有我的痛苦」。工業界林大輝話好多中小企兩頭唔到岸，擔驚受怕，財爺「你有你中產生活，我有我中小企忙碌」。議員發揮無限創意，唔怪得知香港創意產業發展蓬勃啦！