林鄭劍橋炒車斷腳

【明報專訊】財政司長曾俊華發表「中產論」後，咖啡同法國電影頓成「中產指標」。政務司長林鄭月娥噚日喺官邸招呼傳媒，唔少行家追問佢係咪鍾意飲咖啡，林太似乎估到記者想「跣」佢，聽到「中產」兩字就耍手擰頭唔回應，淨係話自己係基層出身，仲透露自己當年曾喺劍橋炒單車。


自認基層 讀書未坐過飛機

林太話自己出身基層，讀書時一直冇機會搭飛機，加入政府後有機會赴英進修。佢話，當年好鍾意喺劍橋踩單車，不幸有次喺公路上被汽車撞斷腳，雖然要留院一個月，最終仍然考第一，林太果然「好打得」。


林太嘅家人一直住喺英國，佢一個人獨居偌大嘅山頂政務司長官邸。被視為工作狂嘅佢，有冇善用官邸嘅設施好好享受呢？佢坦言通常只喺官邸瞓覺，或者招待客人，但就話家冇再凌晨3點發電郵畀同事喇。至於係真唔係，就要問過班公務員先知喇！


官邸用途：瞓覺待客

唔好以為林太日做夜做冇娛樂，原來佢愛好打羽毛球，喺扶貧委員會同前香港羽毛球代表隊成員陳念慈結為朋友，家每兩星期打一次。林太亦喺官邸種植士多啤梨、油麥菜同生菜，仲話愛好園藝嘅CY有向佢教路喎。