停車熄匙罰款估多咗

【明報專訊】噚日預算案除咗公布政府未來一年開支，亦交代各項收入，Emily發現，2012/13年度因交通違例發出嘅定額罰款通知書，金額接近3億，較原來預算2.7億增加11％，睇嚟警察都幾勤力喎。不過，因停車唔熄匙被票控嘅收入，全年只得約2000元，遠較原來預算嘅115.2萬元少咗99.8％。


較預算少99.8％

數字顯示，環保署嚴重錯估停車熄匙違法嘅人數，以每宗票控320元推算，即係原本預算一年有3600宗票控，但結果只有6宗。點解預算同實際情况有咁大出入？環保署無正面回應Emily，但就強調希望透過「執法和宣傳教育」嘅方式，幫助司機養成停車熄匙嘅習慣，減少對環境滋擾。發言人又話，法例自2011年12月實施，至今共向9名司機發出定額通知書。