預算案網上同步蝦碌

【明報專訊】財政預算案內容複雜，政府每年喺財政司長曾俊華宣讀預算案嘅同時，安排一班相關官員，為記者解釋內容及提供補充當資料。


「估錯數」貼紙曝光 官員收起

不過，今年有官員為咗可以快啲搵到「貓紙」上嘅答案，喺回應記者提問前，將「估錯數」sticker，貼喺相關補充文件上，有記者唔覺意睇到，忍唔住笑笑口，官員就一臉尷尬，急忙收起「估錯數」sticker。


查實今年財爺宣布預算案仲有其他蝦碌嘢，但就未必所有市民都發覺，因為每年喺立法會發表財政預算案時，網上都會同步上載有關段落，等市民有soft copy睇住，點知今年財爺讀完「提升社會福利」一節後，本來仲公布咗10項改善安老服務同殘疾人士嘅康復服務措施，但唔知點解網上無同時更新，搞到記者以為財爺唔小心撈亂咗份預算案嘅次序。


最後有記者向官員反映，「失蹤咗」嘅安老同殘疾人士服務措施，先至可以「重現」預算案網頁。