克勤fb諷「無恥」

【明報專訊】沙田田心區補選如箭在弦，候選人嘅「黑材料」開始橫飛。民主黨日前發現有人冒認該黨發出電郵，套取該黨參選人丁士元助選團嘅資料，而民建聯噚日亦批評民主黨喺區內亂掛橫額。


民建聯陳克勤噚日喺facebook上載一張相，顯示佢喺區內嘅橫額，被一幅「團結總動員，支持丁士元」橫額遮蓋，但佢個嘜頭仍然可見。克勤喺fb語帶嘲諷，話究竟係丁士元入咗民建聯，所以獲佢支持，定係民主黨同丁士元「極度無恥，誤導市民」喎。


指助選團無心之失 丁士元say sorry

丁士元噚日得悉事件後即時向克勤say sorry，佢話事件係助選團無心之失，強調佢哋嗰塊橫額係用棍支撐，有助選團看管，而非就咁貼落克勤塊橫額。


代表建制派出選嘅公民力量潘國山，喺上屆區選臨時讓路畀民建聯劉江華參選，為劉江華參選超級區議員鋪路，落選嘅劉江華入官場後辭埋區議員。據地區消息講，潘國山本來勝望較高，但市民似乎唔多滿意劉江華對該區「用完即棄」，令丁士元有得爭。同區參選嘅仲有人民力量林匡正同蘇佩琳。