周梁﹕繼續「不營不粉」

【明報專訊】自由黨噚日舉行新春團拜，同黨友、支持者聯誼一番，該黨早前成立關懷基金，幫助學生小五至中六嘅學費，曾經接受自由黨資助嘅學生唐鉞，家已經大個仔，噚日仲親手畫咗幅國畫畀自由黨，黨主席周梁淑怡好開心。


獲資助學生贈國畫

周太話，今年係自由黨成立20年，之前自由黨因為政治壓力，有好多事都少講，但最近好多人都向佢反映，話自由黨立場清晰咗，仲提到自由黨差唔多係唯一政黨，一方面走直選嘅路、一方面認同香港有需要有功能組別。


至於同政府關係，周太強調會繼續「中堅中立、不營不粉」原則，但就話為佢哋所代表嘅人說話，有時都需要好大堅持同勇氣，希望大家支持。噚日自由黨團拜無官員出席，周太話以往團拜都係咁喎。


周太獻唱 田少送花

黨舉行團拜，主席獻技當然唔少得，周太噚晚即席獻唱《月亮代表我的心》，連榮譽主席田北俊都忍唔住喺台上偷咗朵玫瑰花獻畀周太。


有記者叫田少上台開金口，田少就同常委丁午壽合唱一首《友誼之光》，仲同成個黨「安哥」一次。