民建聯新搞作 18區搞免費調解

【明報專訊】民建聯噚日幾個內部委員會搞春茗，專業事務委員會主席陳曼琪（Maggie）透露，會成立一個專業同盟，為18區街坊提供免費調解，主打樓宇滲水，早前Maggie同黨友爭立法會選舉九龍東席位名單第二位置爭到出晒面，佢今次就話，唔怕義工服務會同市面嘅調解員爭生意，反而好多調解員想佢哋幫手推廣咁話。


呢個新計劃叫「專業同盟」，Maggie話，免費調解服務只係頭炮，遲啲仲會搞免費法律同其他專業義務服務。佢哋先會為18區提供每次6小時嘅免費調解服務，將來需要幫助嘅街坊可以搵所屬當區區議員，等佢哋幫手聯絡。


Maggie話，民建聯成日強調「和諧」，打官司又好嘥錢，見到好多街坊都未知調解係乜，所以先有成立「專業同盟」呢個念頭，民建聯嘅認可調解員周世平話，「專業同盟」遲啲有啟動禮，但未定日子。