CY再拒收「你呃人」咕

【明報專訊】究竟議員定官員嘅知名度高啲？喺噚日立法會一年一度嘅新春午宴可見端倪。立法會噚日宴請官員慶新年，按照傳統議員同官員會組織競技鬥一番，今年就考憑照片認人，由議員認官員，官員認議員，最終由官員隊爆冷勝出。


反擊謝偉俊 長毛出動馬恩國名句

梁振英嚟得立法會，又點能夠全身而退而唔畀人狙擊？社民連「長毛」梁國雄再次帶住社記出品嘅「你呃人」攬枕，喺玩遊戲期間全程企喺CY隔籬，但梁振英就望都唔望，扮睇唔到。謝偉俊睇唔過眼，出聲叫長毛離場，仲話「聖誕節都要停火」，但就畀長毛批評佢「手指拗出唔拗入」，又以民建聯馬恩國名句，話謝「not even a fxxking host」（你連一個該死的主人家也不是）。長毛事後聲言，佢只係講「freaking」（怪誕），唔係爆粗，又話送攬枕畀CY只係為佢好，咁都唔收係小器。


噚日嘅認人遊戲由公民黨湯家驊、民建聯梁志祥同金融界吳亮星組成嘅議員隊，大戰食物及衛生局長高永文、商務及經濟發展局長蘇錦樑同行會成員查史美倫嘅官員隊，佢哋要鬥快講出電腦顯示嘅官員或議員相片中人嘅名字，講埋對方職銜或者所屬界別仲會加分。


睇相認人 議員隊不識張震遠

率先落場嘅官員隊表現唔錯，唔知係咪局長游說議員多，基本認得晒所有議員，唯獨對住新丁議員勞工界潘兆平張相，足足靜默咗5秒都認唔出，台下仲有人認錯相中人係旅遊界姚思榮，睇嚟呢兩位議員都要檢討吓自己係咪太少發聲喇。


至於議員隊表現就稍為差少少，竟然連頭號梁粉、身兼市建局主席嘅行會成員張震遠都認唔出，又一度搞亂同樣係行會成員嘅胡紅玉同查太，最終以一分之微輸咗畀官員隊。


立法會主席曾鈺成就打圓場，話結果顯示議員嘅知名度較官員高，呼籲官員多啲出嚟見市民喎。