議員雲吞麵宴請領事

【明報專訊】立法會議員近期同德國駐港總領事蘭布斯多夫（NikolausGraf Lambsdorff）關係搞得好好，一班議員早排去德國考察之後，噚日宴請答謝總領事，但係唔係食珍饈百味，而係齊齊去食雲吞麵，領事都非常開心，仲帶埋領事太太同埋領事館職員一齊出席。


臨時臨急轉場都食得好開心

有份促成今次「麵局」嘅會計界梁繼昌話，呢餐本來安排去中環IFC一間餐廳食，但去到之後先發現餐廳好多人，而且營運模式似快餐店，只能夠逗留半小時，咁樣招呼領事，梗係唔係咁好，結果佢哋一行十幾人都有啲狼狽，即刻搵食店轉場，好彩飲食界張宇人喺度，有佢出面，拉大隊去咗商場內間正斗粥麵醫肚。梁繼昌就話，雖然大家坐得親密啲，亦只係食啲平民嘢，但外籍人士食到本地小食，都好開心。


立法會同德國領事近來交往多咗，會計界嘅梁繼昌都有功勞，因為舊年9月佢一支公去德國考察，當時香港搞緊佔領運動，外國人都好關心香港，佢有機會同當地議員、官員交流，而之後德國政府亦邀請一班立法會議員去當地交流。


佔領運動嗰陣，德國總領事曾經講過為香港年輕一代自豪，噚日佢同議員聚會，就主要係風花雪月。梁繼昌講笑話，喺雲吞麵舖，好難想像大家可以傾到正經事。