「心臟唔掂」 夢熊入院過年

【明報專訊】「Dream bear」劉夢熊自從上月大爆特首梁振英選舉「內幕」之後，好似諸事都唔多順，估唔到嚟到新正頭佢貴體違和。夢熊話年廿九入咗跑馬地養和醫院養病，Emily諗住探吓佢，點知都係被拒門外，佢只係話自己心臟唔掂，可能會隨時中風。


Dream bear卧病，Emily噚日打電話同佢拜年，佢把聲氣若游絲，話自己心臟唔掂，可能隨時中風，所以醫生喺年廿九都要佢入院，家仲輸緊液，但就冇講吊緊乜嘢液體。本來Emily想上去探佢，但夢熊唔肯透露住喺邊間病房，跟住就收咗線喇。夢熊喺1月尾接受《陽光時務週刊》訪問後都試過血壓飈升，要去養和醫院檢查，同埋食降血壓藥。新年流流，Emily喺度祝願佢早日康復。