電盈播英超 手機可預錄

【明報專訊】英超打咗半季多啲，忠實粉絲睇埋呢幾個月，下季要睇嘅話，又要頭痕搞轉台喇。事關電盈（0008）個now TV就攞咗英超轉播權。眾所周知，連希特拉都「cut」唔到有線（1097），普羅大眾要搞嘅話，好大機會又要打爆有線個客戶服務熱線喇。


電盈母子股價即炒高

話說now TV搶到個英超3個季轉播權之後，已經密鑼緊鼓咁準備搶有線啲客，間間大行仲喺之前出埋報告唱好佢，話可以增加電視同埋寬頻收入。電盈股價噚日又再炒多轉上去，收報3.59元，升咗5%咁多，連帶香港電訊（6823）都升咗3.2%至7.46元，英超概念認真唔講得笑。


now TV噚日出咗個「now TV Special Pack」，新客喺2月28日前登記，月費就係398元，再送多6個月免費，而現有客戶就要畀多258元。就咁睇好似好抵咁，但係好似電盈呢啲咁大嘅公司，做生意個數口點會唔精呢。事關呢個計劃要簽足30個月約，即係想睇埋2015/16年球季，就再簽新約，到時收幾多真係未知數喇。再加上，英超2013/14年球季要到8月先開鑼，家簽咗即係要等多5個幾月先有得睇，咁梗係有得免費6個月啦。


不過，今次電盈喺服務上加添新意，畀用戶可以用部智能電話、平板電腦等，周街睇英超賽事，仲有得用手機預錄