俄國藝術展開鑼

【明報專訊】位於沙田嘅文化博物館舉行「法貝熱——俄羅斯宮廷遺珍」展覽，係本港歷來最大型嘅俄羅斯藝術展，有200多件難得一見嘅俄羅斯宮廷珠寶同飾物展品，最珍貴嘅應該係珠寶師彼得．卡爾•法貝熱（1846至1920年）（Peter Carl Fabergé）為俄國王室設計嘅4枚復活蛋珠寶擺設。


展品由莫斯科克里姆林宮博物館與費斯曼礦物博物館借出，全部係19世紀末至20世紀初俄羅斯珠寶工匠嘅作品。展覽分3個部分，第一部分介紹法貝熱同其公司嘅歷史，展出作品與寶石收藏。第二部分介紹俄羅斯羅曼諾夫王朝及兩個末代沙皇同法貝熱嘅密切關係。第三部分可以睇到宗教器物、民間珍寶如銀器等。


展期至4月29日，但留意農曆新年除夕提前喺下午5點休館，逢星期二（公眾假期除外）及大年初一、初二休息。展覽標準門票20元。