民建聯「剪布」當剪綵

【明報專訊】多個建制黨派噚日舉行年宵開幕禮，闊別維園兩年嘅民建聯，今年開幕好鬼政治化，特登攞塊布嚟剪綵，常委葉傲冬驚人唔明佢哋嘅用意，畫公仔畫出腸，「我哋家剪布……唔係，係剪綵」，擺明諷刺上年泛民拉布，要立法會主席曾鈺成剪布。


剪慣紗布 高醫生應邀剪布

民建聯作為立會第一大黨，唔少局長畀面恭賀，呢排搞奶粉同牛肉搞到一頭煙嘅食衛局長高永文，剪布剪得幾落力，鍾樹根笑話局長做番老本行，「（高永文醫生）剪慣紗布」。民建聯噚日公布年度漢字評選結果，喺5885份投票中，「和」字攞到1623票，成為年度漢字。曾鈺成話，中國文化以和為貴，新春人人都講嘅「和氣生財」、「一團和氣」都有「和」字，希望唔同理念嘅人和諧相處，對身邊人都要和藹可親、關係和睦咁話。


黃洋達分新民黨燒豬

另邊廂，新民黨嘅年宵攤位主打蛇年iPad套、暖手枕，佢哋噚日都搵咗曾鈺成做嘉賓，仲切燒豬慶祝。副主席田北辰笑稱，黨成立咗兩年，佢身邊幾個區議員同助理生咗3男2女，算係「兩年抱五」，又話以前嘅人講「想買樓，搵葉劉」，家就變成「想抱B，搵MT（Michael Tien，田北辰洋名）」。


隔幾檔遠嘅熱血公民見新民黨呢邊咁熱鬧，有人過去新民黨話想分燒豬，最終真係分一得盒返嚟，黃洋達仲將啲相upload上facebook。Emily去到熱血公民攤檔嗰時，就發現燒豬已經清晒。