換心飛魚過年戒肥膩

【明報專訊】嚿年8月患上急性心肌炎、其後接受換心手術嘅13歲「小飛魚」林言臻，出院回家休養已經一個幾月喇。Emily噚日聽林太講，言臻康復進度唔錯，家每日都有落街散步，有時亦會去學畫畫。到咗農曆新年，言臻就會去親戚屋企拜年，但暫時要戒口唔食得肥膩嘢。


一罐汽水3姊妹分

不過，林太知道言臻鍾意飲檸檬茶同汽水，所以喺醫生批准之下，有時都會畀佢「放肆」一下，但就笑話一罐汽水會分埋畀妹妹3個人飲。由於言臻暫時要多留喺屋企，林太話呢段時間同個女日日見，大家了解對方都多咗，亦令言臻喺忙碌嘅讀書生涯中可以「唞一唞」。


康復進度唔錯 等9月開學

言臻同Emily提到，本來醫生想佢3月開始重返校園適應，但爸爸就覺得9月新學年先至返學會好啲，等佢可以休養多少少，到時會返學校讀中二。佢仲好精靈咁話，自己身體狀况同以前差唔多，只係暫時未可以行太耐，跑步有啲吃力，家未知幾時可以游番水。


農曆新年就快到，林太話好開心一家人一齊過新年，亦祝願所有香港市民新年快樂、身體健康，Emily就希望言臻一家健康快樂。