林太開心破例收禮

【明報專訊】第二年舉辦嘅《西九大戲棚》噚日開鑼，身兼西九管理局董事會主席嘅政務司長林鄭月娥出席切燒豬，祝演出順利。大戲棚今年除咗有粵劇演出，仲有別具節日氣氛嘅傳統市集，邀請咗本港唔少傳統工藝免租擺檔。


敏叔撕紙30年 林太：唔收唔得

Emily見到全場約有25個攤檔，包括傳統同現代工藝，仲有小食亭。比較特別嘅，係撕藝大師李敏昇（敏叔）嘅「撕紙功」，佢靠一雙手、一張顏色紙就可以撕成唔同圖案，包括「林鄭月娥」四字，林太收到張手工紙後喜上眉梢，仲笑話平時都唔會收禮物，但呢份唔收唔得。


68歲嘅敏叔早喺1983年已經自創手藝，全靠屋企入面有「大吉」嘅揮春，敏叔話當年喺屋企無聊拎起一張紙，隨手撕吓撕吓就撕咗大吉嘅字出嚟，經過多年苦練，家乜嘢圖案都難唔到佢，而且仲會周圍傳授技術，唔擔心「教識徒弟無師父」。以往敏叔會去尖沙嘴文化中心嘅康文署藝墟擺檔，但近年收費太貴，佢唯有轉戰九龍城公園附近。一般而言，請佢撕一個字，盛惠10元，但若果唔係特別有要求，敏叔往往都會將作品當禮物送畀一班街坊。


如果市民有興趣去大戲棚，今日起至2月16號（除咗大年初一同初二休息），每日下晝3點至10點半都會免費開放。