網民惡搞 狼熊不再互攬

【明報專訊】人稱Dream Bear嘅劉夢熊，接受《陽光時務週刊》訪問時猛轟梁振英，又質疑梁過橋抽板，網民就戲言要食住花生等睇戲，搞到成地花生殼。周刊就突然變成搶手貨，Emily問過周刊市場部，職員李小姐話，噚日有部分報紙檔同便利店話賣到斷市，所以即刻加印1萬本。


李小姐同Emily講，佢哋為香港、台灣、澳門同馬來西亞四地發行3萬本書，由於香港銷量好，噚日再加印1萬。佢話，收到網友話買唔到，叫網民講低嗰間便利店號碼畀佢哋，等佢哋可以即刻補貨咁話。


周刊搶手加印一萬

Dream Bear向梁振英放「核彈」成為政界熱話，噚日立法會續會，有唔少議員把握機會，睇熱辣出爐嘅周刊。另外，有網民同情Dream Bear被人稱「狼英」嘅CY「用完即棄」，即刻出現惡搞圖，話昔日狼熊互攬，今日就趕盡殺絕。另外，又有網民將啤啤熊公仔、今期嘅周刊、Dream Bear嘅畫面同一地花生放埋一齊，真係意味深長！