網民窒伍婉婷老屈遊行人士

【明報專訊】喺特首選舉支持梁振英嘅灣仔區區議員伍婉婷，日前喺警方諮詢區議會嘅會上話，有婆婆因為元旦遊行封路、救護車受封路影響，心臟病發延遲咗幾個鐘送院，翌日不幸過身。但消防處翻查後話，元旦中午12點到晚上9點出車紀錄，「沒有特別延誤」。有網民質疑Yolanda「老屈」遊行人士，仲幫佢整咗張「黑紙」。


Yolanda噚日向Emily吐苦水，話當時事主3點報警，其後聽到救護車聲，等10分鐘先有車到，6點至入到院，有無延誤就唔知，不過就確係有街坊同佢反映。佢強調唔係針對遊行人士，只係希望警方日後封路改道，有關安排能加強照顧突發需要。


街坊反映 唔係針對

Yolanda強調，喺警方嚟區議會做諮詢會前，都做咗好多調查，仲同遊行人士傾過；今次因為講出街坊意見就被批評，覺得有少少委屈，又話區議會無可能審批遊行路線。主辦遊行的民陣就指伍婉婷承機抹黑遊行，要求佢收回不負責任言論，並向在元旦日所有參與遊行市民道歉。