陳可辛窒劉偉強貪靚

【明報專訊】講起「長毛」，大家第一時間會聯想到立法會議員「長毛」梁國雄；其實，電影圈都有個「長毛」，就是導演陳可辛（Peter），但Peter跟另一位導演劉偉強，兩個加埋百歲的大男人，早前齊齊出席新作《血滴子》的活動宣傳時，竟然在眾目睽睽下鬥嘴，爭着認做「長毛」，大姐大也禁不住笑，兼服了他們。


私底下老友鬼鬼

劉偉強表示：「我認識Peter耐過吳君如，但我才是長毛，他偷用我個名。」Peter立即反駁：「你是鬈毛，不是長毛。你以前做攝影師把長髮電鬈，不知幾娘！」劉偉強雖然被「長毛」Peter公開揶揄，但沒有嬲，因他們私底下十分好朋友，84年同在嘉禾工作時已認識。當時Peter是助理製片，劉偉強是助理攝影師，兩人已合作；但離開嘉禾後，大家各自發展，其間Peter執導的電影，劉偉強都幫手做過攝影。Peter說：「劉偉強做了導演後，我們一直想合作，但苦無機會，終於在《十月圍城》拍攝後期，因發生一些問題而臨時搵劉偉強幫手執導，才促成今次我們正式合作。」


新片硬要演雍正

以為Peter正正經經講戲，他繼續忍不住窒劉偉強。他反對劉偉強在《血滴子》客串演出雍正一角，但劉偉強硬要自己做，「幾十歲人都唔化，你估你還是靚仔咩，有無搞錯，他不聽勸！愈叫他不要做，他愈要做，不過化妝出來，又真的幾似雍正，最似是個眼袋，我叫他演出時不要做Facial，多幾條皺紋，蒼老一點更加似。」


迫不得已做串星

大姐大聽得出Peter是暗窒劉偉強貪靚，認識劉偉強多年，他以前真的不貪靚，但自從減肥成功身形弗了，不見了肚腩後便愈來愈貪靚；每次出席活動，不是西裝筆挺，都執到正一正。劉偉強反擊，表示自己是迫不得已，「我之前搵過劉燁和陳道明，但他們都有工作在身沒有期，還有兩日便拍完，呼救無援下，我才頂硬上。我都十五、十六，但真的沒辦法！」大姐大深明導演之苦，有時很多過鏡角色或閒角，不好意思拍膊頭搵人幫手，倒不如自己上陣。