民政署卧底查無牌旅館

【明報專訊】臨近聖誕新年，民政署為咗來港旅客唔會投宿無牌旅館，轄下牌照事務處人員，近日加緊掃蕩無牌旅館，早前更扮鬼扮馬「放蛇」到無牌旅館蒐證。政府新聞網噚日介紹，話本身係輔警嘅食環署女職員Ice，講起「做嘢」之前，會事先了解目標旅館嘅主要客源，然後構思用乜嘢身分放蛇。若旅館主要招待內地旅客，佢會夾埋識講普通話嘅拍檔行動；若係時鐘酒店，就同拍檔假扮情侶租房。


地產經紀參與經營

為逃避執法人員線眼，有啲違例經營旅館嘅老闆，會拉攏地產經紀參與經營無牌旅館勾當。Ice試過同男同事假扮情侶，到一間被列調查對象嘅地產公司，話想租一個短期暫住單位。「身有屎」嘅地產經紀就一直查問Ice兩人做乜嘢工，連佢哋嘅背景都想起清，好彩Ice夠機警過關，成功租到單位，牌照處亦攞到足夠證據，將地產經紀入罪。