董驃世侄迷途知返變冠軍策騎員

【明報專訊】已故著名評馬人董驃嘅世侄、策騎員鄭家寶，喺晨操時由佢操練嘅「加州萬里」舊年贏得屬國際一級賽嘅香港盃，揚威國際，今個月9號，「加州萬里」就會爭取衛冕香港盃。原來，41歲嘅鄭家寶同唔少年輕人一樣，曾經貪圖玩樂，幾乎自毁前途。


貪玩愛飲酒 一度迷失

鄭家寶父親鄭少雄係香港資深策騎員，仲係董驃嘅結拜兄弟。鄭家寶喺老竇鼓勵下，13歲就開始學習騎馬。但鄭家寶年少時貪玩，沉迷飲酒，做策騎員嘅頭幾年成日遲到曠工，仲試過宿醉未醒就騎馬。之後佢晉升為副練馬師，工作態度有所改善。


直至2009年，鄭家寶得到著名練馬師告東尼賞識，負責操練「加州萬里」。鄭家寶話，「加州萬里」同自己嘅際遇好相似，最初呢隻馬只有900幾磅，非常體弱，無人留意，而佢自己以前亦都迷失過，渾渾噩噩，無人會諗到佢會有今日嘅成就。


鄭家寶話，「加州萬里」舊年贏得香港盃，係佢騎馬10幾年來最開心嘅一日，佢亦都無忘記當年董驃嘅教誨，喺獲獎嘅一刻，仲默默向驃叔講咗聲多謝