廣藥升停板 全靠「偉哥」

【明報專訊】噚日內地A股升到開晒巷，好似廣藥（0874）咁就AH股齊飛，A股升停板，H股就升超過4%，點解表現咁好？原來係偉哥效應，之不過並唔係話廣藥會生產壯陽藥，而係佢哋母公司請到有「偉哥之父」之稱、1998年諾貝爾生理醫學獎得獎者穆拉德博士加盟，幫廣藥做保護心腦血管同防治老年癡呆嘅研究工作。


偉哥之父加盟 掌醫藥研究院

據廣藥嗰邊講，穆拉德博士早嚮今年1月已經答應出任廣州醫藥研究總院院長，而今次佢同集團再進一步合作，將會擔任廣藥集團科研工作站嘅指導老師，除咗幫手培養醫學人才之外，仲會進行保護心腦血管同防治老年癡呆嘅研究工作。


除此之外，聽廣藥集團總經理李楚源講，穆拉德仲會協助引進來自全球嘅醫藥資源，帶動集團產品升級。而且原來穆拉德本身就一直對中草藥研究超過20年，所以希望可以致力繼續開發中藥，幫助中藥打入國際市場。


至於點解穆拉德會被人稱為「偉哥之父」，原來佢響1977年發現利用一氧化氮可以紓緩同擴張血管，能夠有效緩解心絞痛，起到治療心臟病嘅作用，呢個發現令到佢獲得1998年的諾貝爾生理醫學獎。同時，一氧化氮嘅擴張血管功能亦成為日後偉哥成功面世嘅重要基礎理論，所以啲人認為，冇穆拉德嘅發現就唔會有偉哥嘅誕生，因此尊稱佢為「偉哥之父」。


email:piano@mingpao.com