「擱」與「撤」之間有好大解釋空間

【明報專訊】國民教育風波，政府擱置指引，反國教科大聯盟就話對政府堅持唔撤表示失望。其實喺「撤」同「擱」之間，睇番字典，真係有好大嘅解釋空間。


「撤」為解消、除去

查吓字典，根據商務印書館出版嘅《辭源》，「撤」意思撤除、解消，如果古時「撤茶」，即係要逐客。至於中華書局出版嘅《辭海》，就解為「除去」也。《論語．鄉黨》就有一句「不撤薑食」，意即每餐有薑食。


「擱」係放置、停頓

至於政府今次用「擱」而非「撤」，據《辭源》，擱即放置，又或停頓、停滯。至於《辭海》中，「擱」是解作高擱或延擱，如擱淺，就係指船陷於沙礁不能前進。至於「擱置」，據台灣教育部國語推行委員會編製的網上國語辭典，可解作放置，如：「把東西擱置在架子上。」但也可解停止不辦，如：「這件事已遭擱置。」