黃毓民被台北起訴

【明報專訊】人民力量黃毓民同前民主黨員馮煒光喺今年初大鬧台北一事，到家仲有後續。事緣佢哋兩個冤家喺台北考察台灣大選時，毓民因不滿馮煒光喺facebook談及佢個仔喺內地被捕一事，同佢發生肢體衝突，馮煒光仲聲稱被打傷。事隔大半年，台北地方法院檢察署噚日以「公然侮辱罪」起訴毓民，唔少高登友都笑言，今次真係多多花生都唔夠食。
 

毓民話可能輕判罰款
 

不過，毓民噚日就話，呢條「公然侮辱罪」，罪名其實相等於喺互聯網鬧人一樣，好可能只係輕判300蚊台幣咁大把，亦即港幣100蚊有找。佢話，仲未收到起訴書，收到後會交由律師處理，而佢作為當事人亦唔需要返台灣處理，又強調事件唔會影響佢日後出入台灣。
 

馮煒光就話，台北方面決定起訴毓民，可以證明佢當日無老作，算係還咗佢一個公道。佢預計兩日後會收到台北地檢署對毓民嘅正式起訴書，到時就會知詳細內容同開庭日期。